Деветнаесет години откако The Devil Wears Prada го дефинираше поимот модна сатира и ни го даде еден од најдобрите филмски ликови на сите времиња, Миранда Пристли повторно влегува во уредничкиот тим на Runaway.
Оригиналниот филм од 2006 година, заснован на истоимениот бестселер на Лорен Вајсбергер, засекогаш си го обезбеди своето место во историјата на поп културата, а откако минатата година беше потврдено продолжението, фановите ширум светот со нетрпение очекуваат каква било нова информација што навестува враќање на Мерил Стрип, Ен Хатавеј и Емили Блант.
Собравме сè што знаеме досега, па еве еден сеопфатен водич за оние од вас (како нас) кои со нетрпение го очекуваат продолжението!
За што ќе биде продолжението?
Според упатените, продолжението ќе го истражува крајот на кариерата на Миранда Пристли во време кога печатените медиуми ја губат трката со дигиталните платформи. Се шпекулира дека Миранда ќе се судри со поранешната асистентка Емили, која сега е високо ставена во моќна луксузна група слична на LVMH. На Миранда и требаат пари, или буџети за рекламирање, за да го спаси своето списание, а сè уште не знаеме каква ќе биде улогата на Ен Хатавеј и другите ликови.
Кој се враќа?
Иако Дизни допрва треба официјално да коментира за актерската екипа, повеќе извори велат дека Мерил Стрип, Ен Хатавеј, Емили Блант и Стенли Тучи се во преговори за враќање. Во развојот на продолжението се вклучени и режисерот на оригиналниот Дејвид Френкел и сценаристката Алин Брош Мекена.
Костимографија
Зад легендарните модни моменти од првиот филм стоеше Патриша Филд, стилистката и одговорна за визуелниот идентитет на серијата „Сексот и градот“. Иако сè уште не е потврдено дали таа ќе се врати за продолжението, модните инсајдери шпекулираат дека костимографијата би можела да заземе нова, посовремена насока инспирирана од актуелните дизајнери како Метиу Блази, Џонатан Андерсон или Чемена Камали. Во секој случај, предвидуваме моден спектакл!
Премиера во мај 2026 година
Дизни официјално го одреди датумот на прикажување за 1 мај 2026 година – точно 20 години откако првиот филм се појави во кината.
Ѓаволот носи Прада е културен феномен. Од неговите незаборавни модни трансформации до неговите фрази („Цвеќиња? За пролет? Револуционерно.“), филмот остави неизбришлива трага, а продолжението е тешка задача што мора да исполни многу очекувања. Остануваме оптимисти и веруваме дека актерската екипа на филмот успешно ќе ја одрази состојбата на креативната индустрија преку неговиот заплет, мода и ликови – исто како и пред 20 години. „Тоа е сè“.
