Добитниците на Оскар, Леонардо Дикаприо и Џенифер Лоренс, ќе глумат во претстојниот филм на легендарниот режисер Мартин Скорсезе, објавува „The Hollywood Reporter“.
Филмот е најавен како адаптација на романот со духови „What Happens At Night“, кој следи брачен пар на патување во Европа за да посвои дете. Приказната се одвива во простран и дотраен европски хотел исполнет со ексцентрични ликови, а сценариото е потпишано од Патрик Марбер, познат по филмот „Closer“, објавува „Индекс“.
Прва соработка за Лоренс
Ова ќе биде првата соработка на Џенифер Лоренс со Скорсезе како режисер, иако тој е продуцент на нејзиниот претстоен филм „Die My Love“. Од друга страна, Дикаприо е еден од најчестите соработници на Скорсезе, а последен пат работеа заедно на филмот на Apple „Killers of the Flower Moon“. Според достапните информации, Apple Original Films е во преговори за финансирање и продукција на филмот со Studiokanal.
Претстојни проекти
ДиКаприо наскоро ќе се појави во филмот на Пол Томас Андерсон „One Battle After Another“, додека Џенифер Лоренс ќе се појави во кината со „Die My Love“. Скорсезе моментално работи на неколку проекти, вклучувајќи ја и криминалната драма сместена на Хаваи, во која главните улоги ги играат Двејн Џонсон и Емили Блант.