Повеќе од 80 сегашни и поранешни учесници на Берлинскиот меѓународен филмски фестивал, познат како Берлинале, потпишаа отворено писмо во кое го осудуваат фестивалот за молчењето за геноцидот во Газа и цензурата на уметниците кои проговориле за него.
Тилда Свинтон, Хавиер Бардем, Анџелики Папуља, Салех Бакри, Татјана Маслани, Питер Мулан и Тобијас Мензис, Мајк Ли, Лукас Донт, Нан Голдин, Мигел Гомес, Адам Мекеј и Ави Мограби се меѓу потписниците на писмото, во кое се наведува дека очекуваат институциите во филмската индустрија да го отфрлат соучесништвото во насилството врз Палестинците.
Тие одлучија да го преземат овој чекор откако претседателот на жирито на Берлинале, режисерот Вим Вендерс, кога беше прашан за геноцидот во Газа, одговори дека уметниците не треба да се мешаат во политиката. Потписниците на отвореното писмо велат дека не се согласуваат со ставот на Вендерс.
„Не можете да го одвоите едното од другото“, велат тие, додавајќи дека ситуацијата во филмската индустрија се менува, наведувајќи го одбивањето на повеќе од 5.000 филмски работници, вклучувајќи неколку големи холивудски имиња, да соработуваат со израелски компании. Тие забележуваат дека Берлиналето претходно јасно се изјасни за злосторствата извршени во Украина и Иран.
„Го повикуваме Берлиналето да ја исполни својата морална должност и јасно да го изрази своето противење на геноцидот на Израел, злосторствата против човештвото и воените злосторства против Палестинците, и целосно да го прекине своето учество во заштитата на Израел од критики и повици за одговорност“, наведуваат тие, меѓу другото.