Кога е жешко, пиеме повеќе течности, а еден од најздравите освежителни пијалоци е лимонадата. Но, експертите велат дека постои уште подобар пијалок – чај. Не само што ладниот чај ќе ве разлади, туку има и бројни здравствени придобивки.
Колку шолји треба да пиете дневно?
Незасладениот леден чај не содржи шеќер, масти или калории и е богат со антиоксиданси. Дури неодамна беше означен како „здрав пијалок“ од страна на Американската администрација за храна и лекови (FDA). Експертите нагласуваат дека и кофеинските и безкофеинските чаеви, како што се црниот, зелениот, белиот или билни чаеви, успешно го хидрираат телото, што е клучно во текот на летните денови.
Иако е одлична замена за водата поради својот вкус, чајот не треба целосно да ја замени водата, туку треба да биде додаток на вашиот дневен внес на течности. Се препорачува да пиете 2 до 4 шолји незасладен чај дневно, заедно со редовен внес на вода.
Без разлика дали е топол или ладен, чајот ги задржува своите корисни својства. Полифенолите (антиоксиданси) остануваат стабилни сè додека не се разредат премногу или не се оставаат предолго. Сепак, важно е да не се претерува со чајот, бидејќи кофеинот и оксалатите во црниот чај можат да имаат негативни ефекти, како што се несоница, забрзано чукање на срцето или проблеми со бубрезите, особено кај луѓе со претходни здравствени состојби.
Значи, ладниот чај е освежителен, здрав, едноставен пијалок кој може да ви помогне да останете хидрирани и разладени во текот на летните денови, под услов да го пиете умерено и без додаден шеќер.