Јапонската уметница Јајои Кусама почина во болница во Токио на 97-годишна возраст, соопшти нејзиното студио.
Јајои Кусама беше една од најпочитуваните современи уметници во Јапонија, а нејзините дела беа изложени низ целиот свет, вклучително и во Музејот на модерна уметност и Музејот на американска уметност „Витни“ во Њујорк и Музејот „Лудвиг“ во Германија. Нејзините дела беа познати по своите повторувачки мотиви, особено точки, кои се појавуваа на платна, скулптури и големи музејски инсталации.
Студиото на Јајои Кусама соопшти дека уметницата сликала до крајот на својот живот. Во соопштението се вели:
„Таа продолжи да слика до последните денови, никогаш не спуштајќи ја четката и продолжувајќи го своето истражување на вечната љубов и вечната душа.“
Тие додадоа дека таа ќе продолжи да ги пренесува своите желби и да им носи надеж и сила на луѓето ширум светот преку својата уметност. Со години, Кусама тврдеше дека го гледа светот покриен со точки, што гo припишуваше на халуцинации што ги доживеала уште од детството.
Иако поминала децении во психијатриски установи, тоа не ја спречило да се пресели во Њујорк во 1957 година и да изгради кариера во време кога апстрактното акционо сликарство доминирало на американската сцена.
Подоцна добила големо комерцијално признание, соработувајќи со модни брендови како што е Луј Витон, а нејзините дела се појавиле и на лиценцирани производи. Во 2008 година, Кристи ги продала нејзините дела за 5,8 милиони долари, додека во 2016 година го добила Орденот за култура на Јапонија, највисокото признание што земјата им го доделува на уметниците.