Според студија на Универзитетот Тулејн во Њу Орлеанс, луѓето кои се изложени на премногу светлина во текот на ноќта имаат поголема веројатност да доживеат промени во структурата и функцијата на срцето, што може да биде штетно.
Научниците велат дека заспивањето со вклучено светло може да го ослаби срцето и да ја промени неговата форма.
Ова не е првпат изложеноста на светлина за време на спиењето да се поврзува со зголемен ризик од срцеви заболувања, за кои се смета дека се предизвикани од нарушувања на човечкиот биолошки часовник.
Истражување објавено претходно оваа година покажа дека изложеноста на силна светлина може да го зголеми ризикот од срцев удар за 56 проценти и да ја зголеми веројатноста за доживување срцев удар за 47 проценти.
Сепак, претходните студии не го следеле влијанието на посветлата средина за спиење врз срцето.
Истражувањето објавено во стручното списание „European Heart Journal“ носи нови сознанија за влијанието на ноќната светлина врз здравјето на кардиоваскуларниот систем.
Иако претходните студии веќе ја поврзаа изложеноста на светлина за време на спиењето со зголемен ризик од срцеви заболувања, тимот научници предводен од професорот Лу Чи се фокусираше на конкретни промени во самата структура и функција на срцето.
„Иако претходните опсервациски студии укажуваа на ризик, малку се знаеше за тоа што точно му се случува на срцето под влијание на ноќната светлина. Затоа ја спроведовме оваа студија за да ги следиме овие промени со текот на времето“, објасни професорот Чи.
Методологијата на студијата вклучуваше долгорочно следење на голем број учесници:
Повеќе од 11.000 возрасни лица во Обединетото Кралство носеа сензор на зглобот во текот на една недела за прецизно да се измери нивото на темнина во кое спиеле.
Три години по првичното мерење, учесниците беа подложени на магнетна резонанца (МРИ) на срцето. Научниците ги споредија снимките на срцето со податоците за количината на светлина на која учесниците биле изложени во текот на ноќта.
Резултатите даваат појасен увид во клучната улога што ја игра спиењето во целосна темнина за одржување на долгорочното здравје на срцето.
Снимките на срцето открија дека оние што биле изложени на најмногу светлина во текот на ноќта покажале задебелување на ѕидот на левата комора – една од срцевите комори – што го намалило просторот во внатрешноста на комората.
Тие исто така покажале рани знаци на срцева дисфункција, бидејќи нивниот срцев мускул имал намалена способност за контракција.
Истражувачите откриле и промени во десната комора и левата преткомора, кои се други две комори на срцето.