Шерон Стоун зборуваше за надминувањето на нејзиниот холивудски имиџ на „секс-симбол“ додека ја примаше наградата за својата филантропска работа и застапувањето на правата на жените на настанот „Моќта на жените“ (Power of Women) во организација на магазинот Variety.
Иконичната актерка, која се прослави со еротскиот трилер „Ниски страсти“ (Basic Instinct) од 1992 година, разговараше со новинарите на црвениот тепих пред свечената церемонија во хотелот „Беверли Хилс“ во Лос Анџелес.
„Мислам дека е многу важно да сфатиме оти сите сме жени со моќ и влијание, бидејќи жените – само поради фактот што се жени – се моќни и влијателни“, рече Стоун.
68-годишната актерка укажа на секојдневните одлуки што жените ги носат дома, почнувајќи од воспитувањето на децата, па сè до водењето на домаќинството и изборот на храна.
„Жената е таа што ги носи сите суштински, секојдневни одлуки во светот. Мислам дека е навистина важно да размислиме за тоа. Тоа е навистина моќно и влијателно“, додаде таа.
Стоун ги охрабри жените да ја користат таа моќ и влијание на сочувствителен, промислен и значаен начин – и на начини што покажуваат грижа едни за други.
За време на церемонијата, таа ја истакна својата работа со Американската унија за граѓански слободи (ACLU), непрофитна организација посветена на зачувување на индивидуалните права загарантирани со Уставот на САД.
„Јас сум производ на Американскиот сон“, им рече таа на присутните, осврнувајќи се на нејзиниот татко, Џозеф Вилијам, кој работел во фабрика во Пенсилванија. Потоа зборуваше за патот што го поминала од времето кога била позната како секс-симбол, нагласувајќи дека стигнала дотука и покрај физичкиот напор што го барало тоа патување.
„Направив премин од тоа да бидам секс-симбол, а тоа го постигнав потпирајќи се на овие мои уморни стапала, кои ме болеа од носењето штикли од 10 сантиметри на бетонски подови. Така што, моќта што ја чувствувам во моќта на жените доаѓа од тоа што стојам меѓу вас и не сум сама додека стојам овде“, рече таа. Инаку, Стоун беше меѓу неколкуте жени од светот на забавата кои на церемонијата добија признание за својата посветеност и филантропија.