Лекарите предупредуваат дека нормалната тежина и добрата физичка подготвеност не секогаш значат дека телото е здраво, бидејќи некои ризици се откриваат само преку медицински прегледи.
Според неодамнешното истражување на „UK Biobank Cohort“, едно од 15 лица со нормален индекс на телесна маса (ИТМ) живее со недијагностицирано кардиоваскуларно заболување или метаболички фенотипови со висок ризик. Друга студија покажала дека повеќе од половината луѓе со нормален ИТМ имаат барем една метаболичка абнормалност, пренесува „Метро“ (Metro).
Поради ова, експертите ја нагласуваат важноста на редовните прегледи, особено за крвниот притисок и холестеролот. Сузан Вајли, лекарка од општа пракса и медицински советник за „IQdoctor“, вели дека високиот крвен притисок не може сигурно да се процени врз основа на изгледот или на тоа како некој се чувствува:
„Редовно среќавам луѓе кои се изненадени кога ќе слушнат дека имаат висок крвен притисок, бидејќи вежбаат, се хранат прилично здраво, имаат здрав ИТМ и се чувствуваат сосема нормално.“
Со текот на времето, нетретираната хипертензија може да го зголеми ризикот од срцеви заболувања, мозочен удар, срцева слабост и заболувања на бубрезите. Истото важи и за покачениот ЛДЛ-холестерол, кој може да придонесе за таложење масни наслаги во артериите; генетски високиот холестерол може да се појави и кај помлади луѓе кои изгледаат здраво.
Знаците што не треба да се игнорираат вклучуваат постојан замор, отежнато дишење што се јавува полесно од порано, лош сон, гласно ‘рчење, утрински главоболки и поспаност во текот на денот. Вајли напоменува дека самиот замор не е доволен за поставување дијагноза, но може да укаже на лош сон, стрес, анемија или проблеми со тироидната жлезда.
Наглото зголемување на жедта, честото мокрење или будењето во текот на ноќта поради потреба од тоалет, понекогаш може да укажуваат на дијабетес или заболување на бубрезите. Промените во срцевиот ритам во мирување – особено ако срцето често чука побрзо додека лицето е опуштено – исто така бараат консултација со лекар, особено кога се придружени со чувство на забрзано чукање на срцето (палпитации), вртоглавица, несвестица или отежнато дишење.
Семејната медицинска историја е уште еден важен фактор. Вајли истакнува дека едно лице може да одржува здрава тежина и редовно да вежба, а сепак да има наследена поголема склоност кон кардиоваскуларни заболувања, висок холестерол, дијабетес или други здравствени состојби.