Американскиот режисер Квентин Тарантино, кој со години најавува дека ќе се повлече по својот десетти долгометражен филм, го заврши сценариото за својот последен проект.
Сепак, тој нема да започне со работа на него сè додека не заврши изведувањето на неговата театарска претстава „The Popinjay Cavalier“.
Тој го откри ова за време на гостувањето во емисијата „The Graham Norton Show“, заедно со гостите Елен Деџенерис, Колин Фарел и Џема Чан. Ова беше негово прво појавување во емисијата по повеќе од една деценија.
„Напишав сценарио што навистина ми се допаѓа, но сакам да ја реализирам претставата и да видам кој сум јас. Потоа ќе се вратам, ќе поминам време со семејството, ќе поживеам малку, па ќе видам што сакам да правам понатаму“, изјави Тарантино.
Тој исто така откри дека првично го напишал „The Popinjay Cavalier“ како филмско сценарио, но сфатил дека материјалот всушност подобро функционира како театарска претстава.
„Мислам дека ќе биде возбудливо“, додаде тој.
Претставата – опишана како авантуристичка комедија во која има борби со мечеви – треба да има премиера во лондонскиот театар „Феникс“ (Phoenix Theatre) во март следната година, по претпремиерните изведби кон крајот на февруари. Таа ќе се прикажува три месеци, сè до 13 јуни, а во главната улога ќе настапи Саша Барон Коен.
„Едвај чекам да им овозможам на публиката на Вест Енд одлична вечер“, изјави Тарантино кога претставата беше првично најавена.
Неговиот последен филм останува „Беше еднаш… во Холивуд“ („Once Upon a Time… in Hollywood“) од 2019 година, во кој главните улоги ги толкуваа Бред Пит, Леонардо ди Каприо, Маргот Роби, Маргарет Кволи и други. За својата улога во тој филм, Пит освои Оскар за најдобра машка споредна улога, додека Барбара Линг и Ненси Хејг беа наградени за најдобра сценографија. Тарантино беше номиниран за најдобар филм и најдобра режија, а Ди Каприо за најдобра машка улога.