Наталија Брајант дебитираше во неделата вечерта на модната ревија на „Victoria’s Secret“, појавувајќи се на пистата во „Sony Studios“ во Калвер Сити, Калифорнија, во розова комбинација од линијата „PINK“ на овој бренд.
Со тоа, најстарата ќерка на легендарниот кошаркар Коби Брајант го оствари својот сон од детството.
Брајант се појави на пистата носејќи украсен црн градник, краток розов кардиган и фармерки украсени со кристали. Социјалните мрежи „зовреа“ во моментот кога ќерката на покојниот Коби Брајант и Ванеса Брајант стапна на модната писта.
Пред почетокот на ревијата, таа за „Page Six“ изјави дека е пресреќна што е дел од овој настан. Таа откри дека уште од мала секоја година ја следела модната ревија на „Victoria’s Secret“, додавајќи дека ги прегледувала снимките од претходните ревии за што подобро да се подготви.
Ова не е нејзина прва соработка со брендот; таа претходно се појави во кампањата за есен 2024 година на „PINK“, подбренд на „Victoria’s Secret“. Како дипломиран филмски работник од Универзитетот на Јужна Калифорнија (USC), таа работи како професионален модел, а минатата година учествуваше и на Модната недела во Њујорк.
На ревијата дебитираше и фудбалерката Тринити Родман. Овие појавувања доаѓаат една година откако ѕвездата на WNBA, Ејнџел Рис, стана првиот професионален спортист што прошетал на модната ревија на „Victoria’s Secret“. На овогодинешната ревија се појавија и модели кои се вратија на пистата, како Џиџи Хадид и Адријана Лима, а настанот се емитуваше во живо и бесплатно на YouTube, како и на каналите на брендот на социјалните мрежи.
Коби Брајант загина во хеликоптерска несреќа во јануари 2020 година – несреќа во која животот го загуби и неговата ќерка Џијана.