Луѓето кои редовно пијат чај имаат помал ризик од кардиоваскуларни болести, но начинот на кој го консумираат – неговата јачина и температура – исто така е важен.
Ова го покажува студија спроведена врз речиси половина милион возрасни лица во Кина, објавена денес во списанието Journal of Internal Medicine.
Истражувачите анализирале податоци за 485.934 возрасни лица, кои биле следени во просек нешто повеќе од девет години. Во текот на овој период, биле забележани 14.863 случаи на срцеви заболувања, цереброваскуларни болести, пулмонални срцеви заболувања и болести на периферните артерии.
На почетокот на студијата, учесниците навеле колку често пијат чај, каков вид консумираат, колку силен чај подготвуваат и колку топол го пијат.
Умерено силен и не премногу топол
Според соопштението од издавачот Wiley, редовното консумирање чај е поврзано со 11 отсто помал ризик од кардиоваскуларни болести. Меѓу оние што пијат чај најмалку еднаш неделно, најнизок ризик е забележан кај оние што консумираат од шест до осум шолји дневно.
Црниот чај покажа поконзистентна поврзаност со помал ризик во споредба со зелениот чај. Најнизок ризик е утврден кај оние што пијат чај со умерена јачина.
Што се однесува до температурата, резултатот е спротивен. Оние што изјавиле дека пијат „врел“ чај (што „го гори“ јазикот) се соочуваат со поголем ризик од кардиоваскуларни болести. Според д-р Лиана Вен, која даде изјава за CNN, овој ризик бил за 16 отсто поголем отколку кај луѓето што не пијат чај редовно.
Најнизок ризик е забележан кај поединци кои редовно пијат чај, не пушат и се физички активни. „Комбинираните анализи покажаа дека консумирањето чај, пушењето и физичката активност се заеднички поврзани со ризикот од васкуларни болести“, наведуваат авторите.
Што студијата не докажува
Ова е опсервациска студија, која укажува на поврзаност, но не докажува дека чајот директно го штити срцето. Учесниците сами ги пријавувале своите навики, а големината на шолјите не била стандардизирана. Затоа, консумирањето од шест до осум шолји дневно не треба да се толкува како препорака – факт што го нагласуваат и самите автори. Претходните истражувања, исто така, го поврзаа консумирањето на многу жежок чај – со температура над 55 до 60 степени – со зголемен ризик од рак на хранопроводот и желудникот.