Речиси секој мијалник во бањата има мал отвор веднаш под горниот раб. Тој не е таму случајно – станува збор за прелевен отвор, дизајниран да спречи излевање на водата на подот.
Сепак, експертите предупредуваат дека токму на ова место често се собираат нечистотија и бактерии, што може да доведе до појава на непријатни мириси.
Отворот што се наоѓа веднаш под работ на мијалникот е познат како прелевен отвор. Како што објасни водоводџијата Скот Ајман за списанието Real Simple, неговата основна функција е да спречи прелевање на водата, доколку заборавите да ја затворите славината додека одводот е затворен.
„Мијалниците во бањите обично имаат прелевен отвор бидејќи луѓето често го затвораат одводот додека ги мијат рацете или се бричат“, објасни Ајман.
Кога нивото на водата ќе стигне до отворот, таа истекува низ него, наместо да се прелее преку работ на мијалникот. Сличен систем имаат и многу кади. Покрај тоа што спречува поплавување, прелевниот отвор овозможува и побрзо истекување на водата, бидејќи дозволува влез на воздух во одводниот систем, со што се намалува создавањето вакуум.
Отворот е поврзан со скриен канал во внатрешноста на мијалникот, кој води до главната одводна цевка. Ова овозможува водата да го заобиколи самиот слив на мијалникот и да истече директно во одводот.
Зошто е важно редовно да се чисти прелевениот отвор?
Остатоци од сапун, паста за заби и козметички производи – како и мувла и бактерии – лесно можат да се задржат во овој тесен канал. Со текот на времето, тоа може да предизвика непријатни мириси. Субал Дас истакнува дека прелевниот отвор е еден од оние делови во бањата што луѓето често забораваат да ги исчистат. Ако забележите непријатен мирис во бањата, а сите други одводи се чисти, проверете го токму овој отвор. Се препорачува насобраните нечистотии да се отстранат со мешавина од сода бикарбона и оцет, по што треба да се исплакне со топла вода.
Можете да користите и мала четка околу отворот за да ја отстраните тврдокорната нечистотија. Сепак, избегнувајте употреба на агресивни хемиски средства за чистење, бидејќи тие можат да ги оштетат водоводните инсталации.
Отворот треба да се чисти на секои еден до два месеци за да се спречи таложење на нечистотии и појава на непријатни мириси.