Канадската пејачка Аланис Морисет (52) откри дека е пансексуалка за време на гостувањето во подкастот „Handsome“, кој беше емитуван на 3 ноември.
Таа зборуваше за својата сексуалност во разговор со водителките Тиг Нотаро, Форчн Фајмстер и Меј Мартин. Темата се појави кон самиот крај на подкастот, кога Форчн Фајмстер ги спомена минатите романтични врски на пејачката и песните што произлегле од нив.
„Жал ми е за мажите што те повредиле, но не ми е жал за песните што настанале од тоа“, рече Фајмстер, а потоа праша: „Дали тоа некогаш те навело да посакаш да бидеш лезбејка?“
„Јас сум пансексуалка, така што – да“, одговори Морисет. Нејзиниот одговор ги изненади водителките, па Тиг Нотаро дополнително праша дали пејачката зборува сериозно.
„Чекај, дали навистина си пансексуалка?“ праша таа, на што Морисет одговори: „Да, така е“.
Водителките се пошегуваа дека можела да ја сподели оваа информација уште на почетокот од разговорот, на што пејачката со насмевка одговори: „Сакам таквите работи да ги чувам за крај“.
Пансексуалноста подразбира сексуална, романтична или емоционална привлечност кон луѓе, без оглед на нивниот пол или родов идентитет.
Во брак од 2010 година
Аланис Морисет е во брак со раперот Марио „Соулај“ (Souleye) Тредвеј уште од 2010 година. Двојката има три деца: синовите Евер (15) и Винтер (7), како и ќерката Оникс (10).