Од 19 ноември, Grand Theft Auto VI ќе може да се игра преку Xbox Cloud Gaming на конзолите Xbox Series X|S и Xbox One, потврдија од Microsoft. Стримувањето преку cloud нема да биде достапно на компјутери, мобилни уреди или паметни телевизори.
Во објава на блогот Xbox Wire, Microsoft најави дека играњето преку cloud ќе биде достапно од 01:00 часот по источно време (07:00 часот по локално време) на денот на излегувањето на играта. Ова им овозможува на сопствениците на постарата конзола Xbox One — за која не постои посебна верзија од играта — да ја играат GTA 6.
Сите сесии преку cloud ќе ги користат графичките поставки на Xbox Series S, без оглед на тоа која конзола се користи за пристап до услугата. Друга предност на стримувањето е тоа што играта не мора да се презема, што е значајно со оглед на тоа што таа зафаќа приближно 210 GB простор за складирање.
За играње преку cloud потребна е претплата за Game Pass. Почнувајќи од 11 ноември, играчите во поддржаните региони ќе имаат и опција да купат време за играње преку cloud без претплата: 10 часа за 3,99 долари, 25 часа за 7,99 долари и 50 часа за 11,99 долари.
GTA 6 нема да биде дел од библиотеката на Game Pass при самото лансирање, па затоа играта мора да се купи. Почнувајќи од ноември, Microsoft воведува и месечни ограничувања: 15 часа за Game Pass Ultimate, 10 часа за Premium и 5 часа за Essential.
Microsoft претходно ги демантираше извештаите дека обезбедил ексклузивни права за стримување на насловот и потврди дека GTA 6 нема да биде достапна за играње преку cloud на компјутери. Директорката на Xbox, Аша Шарма, најави дека GTA 6 ќе биде достапна преку cloud, што претставува прв чекор во новото десетгодишно партнерство со Take-Two, матичната компанија на Rockstar. Се очекува во наредните месеци на Xbox Cloud Gaming да пристигнат и Grand Theft Auto V и Red Dead Redemption 2.
Според Microsoft, GTA 6 има најголем број на преднарачки во историјата на Microsoft Store.