
Традиционалниот чин на фрлање монети во римската фонтана Треви наскоро би можел да добие дигитална алтернатива, бидејќи властите размислуваат за воведување терминали за бесконтактно плаќање – што би им овозможило на посетителите да даваат прилози без потреба од готовина, пренесува Република.
Според италијанскиот весник, целта е да се користи електронски систем за да се поедностави процесот на донирање, да се намали зависноста од готовина и да се обезбеди потранспарентно управување со собраните средства.
Фонтаната Треви, која секојдневно ја посетуваат илјадници туристи, е еден од најпрепознатливите симболи на Рим. Фрлањето монета во нејзините води е долгогодишна традиција, заснована на верувањето дека оние што ќе го сторат тоа, еден ден ќе се вратат во италијанската престолнина.
Иако воведувањето дигитални плаќања би можело да го олесни собирањето прилози, се поставува прашањето дали таквата промена би можела да го измени традиционалниот обичај, кој стана составен дел од туристичкиот идентитет на Рим.
Едно од предложените решенија вклучува комбинирање на традиционалното фрлање монети со можности за електронско плаќање, со што на посетителите им се дава избор: да го следат класичниот обичај или да ја искористат модерната технологија.
Намалени приходи и нови прописи
Во текот на првите девет месеци од 2026 година, износот на пари што туристите ги фрлиле во фонтаната Треви се намалил за приближно 174.000 евра во споредба со истиот период претходната година – промена што уследи по воведувањето такса за влез во просторот околу фонтаната, како што пренесува Radio Roma Capitale. Според податоците на католичката хуманитарна организација „Caritas“, во периодот од јануари до септември оваа година од фонтаната биле собрани 1,24 милиони евра, наспроти 1,42 милиони евра собрани во истиот период во 2025 година.
Вкупната тежина на собраните монети, исто така, е намалена за околу 10 до 15 проценти, достигнувајќи 22.740,55 килограми.
Овој пад на приходите се припишува на новите правила за пристап до споменикот, воведени во февруари, според кои туристите треба да платат два евра за да се спуштат до басенот на фонтаната.
Градските власти ја воведоа оваа такса за да го регулираат бројот на посетители и да го заштитат споменикот; Собраните средства се наменети за одржување на фонтаната, како и за овозможување бесплатен влез во градските музеи за жителите на Рим.
Поради поставувањето на бариери и ограничениот пристап, некои туристи сега ја набљудуваат фонтаната од далечина, без да ја практикуваат традицијата на фрлање монети во водата.
Парите што посетителите ги оставаат во фонтаната се користат за социјални програми и за помош на ранливите групи во општеството. Собирањето на монетите се врши во присуство на полициски службеници.
Во периодот од 2022 до 2025 година, организацијата „Каритас“ насочи приближно седум милиони евра – собрани од фонтаната – кон помош на луѓето на кои им е потребна.
Фонтаната ди Треви е изградена помеѓу 1732 и 1762 година, според проектот на архитектот Никола Салви. Централна фигура во композицијата е Океан, најстариот син на Уран (Небото) и Гаја (Земјата) и еден од 12-те титани, додека водата доаѓа во базенот преку аквадукт изграден во 19 година п.н.е.