
По тренингот, на телото му се потребни од 20 до 40 грама протеини за изградба на мускулите, но нема потреба да се брза со нивното внесување. Поважно е да се внесе доволно количество протеини во текот на целиот ден.
Протеините обезбедуваат аминокиселини – основните градежни единици што телото ги користи за обновување на мускулите и синтеза на мускулни протеини по вежбањето, објаснува Нејтан Прат, научник за исхрана во компанијата „Гланбија“ (Glanbia).
Според него, за повеќето луѓе, внесувањето од 20 до 40 грама протеини по тренингот е доволно за силно да се поттикне синтезата на мускулни протеини. Помало количество можеби нема да го даде целосниот ефект, додека значително поголемо количество во еден оброк не нуди никаква дополнителна придобивка.
„Обновувањето на мускулите може да трае и до 48 часа, па затоа доследното исполнување на дневните потреби за протеини е поважно од прецизното време на нивното внесување“, вели Прат.
За оние кои сакаат да изградат мускулна маса, тој препорачува дневен внес од 1,6 до 2,2 грама протеини по килограм телесна тежина.
Нутриционистката Ен Мареј истакнува дека внесувањето доволно протеини, исто така, помага подолго време да се чувствуваме сити. Прескокнувањето оброци и игнорирањето на гладот, напоменува таа, често доведува до желба за грицкање навечер и прејадување подоцна во текот на денот. Затоа, клучно е да се одржува избалансиран внес на протеини, влакна, јаглехидрати и здрави масти во текот на целиот ден.
Што се однесува до најдобриот извор на протеини по тренингот, таа предлага да изберете нешто што можете доследно да го консумирате – било да е тоа говедско, пилешко или мисиркино месо, јајца или грчки јогурт. За оние кои се постојано во движење, таа советува да носат протеински ужинки во чантата или во автомобилот, за да ги консумираат по вежбањето.
Прат го препорачува протеинот од сурутка (whey protein) бидејќи ги содржи сите девет есенцијални аминокиселини и брзо се вари и апсорбира. Протеините од растително потекло, исто така, можат да придонесат за раст на мускулите. Сепак, за оние кои консумираат исклучиво извори од растително потекло, Прат советува малку поголем вкупен внес на протеини.