Италијанскиот премиер Силвио Берлускони е под истрага во врска со проституција на една малолетна девојка и е повикан да се појави пред обвинител во Милано, јавуваат денеска италијанските медиуми. Весникот “Коријере дела сера“ на својот интернет портал наведува дека Берлускони (74) е осомничен за злоупотреба на положбата во обид да ги прикрие средбите со тогаш седумнаесетгодишната Мароканка Руби.
Случајот беше откриен уште пред неколку месеци кога се дозна дека Берлускони интервенирал за девојката да биде пуштена од притовор. Италијанскиот премиер тогаш изјави дека не сторил ништо лошо само му помогнал некому во неволја. Уставниот суд вчера делумно го укина имунитетот на премиерот за кривичен прогон до октомври.