Главниот командант на КФОР, Ерхард Билер, ги негирал изјавите на магазинот “Ало”, дека е во љубовна врска со братучетката на Хашим Тачи, и изјавил дека неговата партнерка има црногорско потекло.
“Сето ова што се пишува овие неколку дена е валкана кампања која се води против мене! Прво почнаа гласините дека сум во врска со млада Албанка, а потоа и дека имам дете со неа …
Ништо од ова не е вистина! Ниту пак е точно дека мојата партнерка има некакви роднински врски со Хашим Тачи. Веќе со години сум во врска со жена од Германија, со која и живеам во мојата земја. Таа во никој случај не е млада Албанка, таа е жена од 50-тина години. И да знаете, таа има југословенско потекло! Нејзината мајка е од Црна Гора, и има роднини во Србија, Босна, Хрватска и Црна Гора … Таа е, ако можам да кажам така, типичен претставник на поранешна “Југославенка “, открил 52-годишиот Билер.