Група на грчки студенти вчера ги прекинале вестите на грчката национална телевизија, јавуваат светските медиуми, додавајќи дека полицијата фрлила солзавец врз студентите кои сакале да ги блокираат влезовите во грчкиот парламент.
Државната телевизија НЕТ беше окупирана, но го решивме проблемот. Се работи за група студенти, изјавил портпаролот на владата Елијас Мосијалос, не наведувајќи други детали.
Пред зградата на Парламентот во центарот на Атина, полицијата фрлила солзавец врз насобраните студенти кои се противат на владината економска политика.
Според грчките медиуми групата студенти ја гаѓале полицијата со шишиња, на што таа одговорила со солзавец. Од полицијата се уште не е потврдено дали при судирот дошло до поголем инцидент.
Мерките на штедење кои ги наметна Европската унија и ММФ предизвикале масовни протести низ целата земја.
Вработените во јавниот сектор, кои се погодени со намалување на личниот доход, изјавиле дека на 5 октомври ќе прекинат со работа, а генералниот штрајк во државата бил закажан за 19 октомври.