МакФест

Макфест за прв пат бил одржан во 1986 година, тој е најголемиот фестивал на македонската популарна музика. Макфест традиционално се одржува секоја година во ноември, во градот Штип, Република Македонија, во Домот на култура “Ацо Шопов”. Манифестацијата Макфест е членка на ФИДОФ (Меѓународната федерација на фестивалски организации) со седиште во Лос Анџелес, Калифорнија, САД. Во 1997 година, фестивалот Макфест бил прогласен од страна на ФИДОФ за “Фестивал на годината”.

По 25 години од првиот Макфест едно е сигурно и јасно: овој фестивал ја воскресна македонската забавна песна и неговиот придонес за домашната забавна музика е огромен и немерлив. Во аналите на македонската забавна песна засекогаш ќе останат хитовите на: Олгица Христовска (Свирете ја зајди, зајди, Грев), Игор Џамбазов (Време за плачење), Банкрот блуз бенд (Моја гитара), Тања Кочовска (Твоите очи, сине), Владо Јаневски (Чаирска романтика и Еден бакнеж), Мики Јовановски – Џафер (Сонце за три света), Дуле и Коки (Виолина и гитара), Ристо Самарџиев (Таму кај што си, Песна за љубовта), Кристијан Габроски (Пак), Тоше Проески (Пушти ме, Морска ѕвездо), Искра Трпева (Допри ме), Магија (Магија), Ерзана (Ноќна кралица), Ареа (Одведи ме), Андријана и Марјан (Љубов ти е адреса).