Лидерот на опозициските социјал демократи во Германија (СПД), Зигмар Габриел, оцени дека канцеларката Ангела Меркел не заработува доволно, бидејќи нејзината бруто плата како претседател на Владата е 17.000 евра месечно.
„Не мислам дека е нормално германската канцеларка да заработува помалку од еден директор на просечна штедилница“, рече Габриел за неделниот весник “Франкфуртер алгемајне цајтунг”.
Канцеларката и министрите во мај го одобрија првото зголемување на нивните плати по дванаесет години. Платите на канцеларот, министрите и државните секретари треба да се зголемат за 5,7 насто на три рати до август 2013. година.
Ангела Меркел, која е на должност од средината на 2005 година, би требало до половината од 2013. година да добива по околу 17.016 евра бруто месечно.
Но, бидејќи таа е и пратеник, ќе добива вкупно 23.000 евра бруто месечно, пишува весникот.
Социјал Демократскиот кандидат за канцелар на изборите во 2013, Пер Стајнбрик неодамна призна дека држел платени предавања што предизвика критики во Германија.