Новиот Mercedes-Maybach S600
Паралелно со Саемот за автомобили во Лос Анџелес, во Кина започна и авто-саемот во градот Гуангзоу, а на кој компанијата Daimler истовремено го претстави својот најнов и воедно најлуксузен автомобил во моменталната понуда – Mercedes-Maybach S600.
Како што најавуваме, ова е и прво официјално појавување на брендот Maybach, кој сега се води токму како подбренд на Mercedes, нешто слично како што е и AMG, откако згасна кон почетокот на 2013-тата година после слабите продажни резултати на суперлуксузните модели “57” и “62”.
Mercedes-Maybach S600 е за 200 милиметра подолга во однос на веќе продолжената верзија на “обичната” S-Class (која има речиси 5.5 метра вкупна должина), што може да наговести дека во ентериерот се нуди повеќе простор отколку кај неговиот претходник, моделот “57”. Секако, самата внатрешност е на едно посебно ниво што се однесува до луксузноста, употребените материјали за изработка и завршната обработка.
Доволно е само да се спомене висококвалитетниот 3D аудио систем кој поседува дури 24 звучника, со вкупна излезна моќност од 1540 W, како и двата големи мултимедијални LCD дисплеи кои се наменети за патниците на задната клупа, а кои се наоѓаат на задниот дел на предните седишта.
Под хаубата на оваа верзија се крие 6.0-литарски V12 biturbo мотор кој ослободува 530 КС и има 830 Nm максимален вртлив момент. Покрај S600, во продажба наскоро ќе се најде и нешто послаба, S500 4MATIC верзија, со V8 biturbo агрегат со волумен од 4.7-литра кој ослободува 455 КС и има 700 Nm врлив момент.
Она што е исто така интересно да се напомене, а на што Mercedes е особено горд е резултатот од се’ на се’ 0.26 кога се работи за коефициентот на отпор на воздухот, што е одличен резултат за вака голем автомобил, а исто така овој модел може да се пофали и со титулата најтивка сериска лимузина на светот со позиција на патниците на задните седишта.
Официјално, цената на оваа верзија се’ уште не е соопштена, но се очекува дека S600 ќе чини околу 200.000 евра во Германија, кога во текот на месец февруари во 2015-тата година ќе стигне во продажните салони, додека поевтината, S500 верзија се очекува од месец јуни, исто така идната година.