Во зима рацете ни се изложени на студ и ветар па затоа е многу важно да посветиме дополнителна грижа за нив. Освен што секогаш кога излегуваме надвор треба да носиме топли ракавици, често треба да ги мачкаме со соодветен крем кој ќе ги потхранува и хидратира.
Барем еднаш седмично е убаво да правиме и маска за рацете. Ви предлагаме неколку лесни и достапни рецепти, кои ќе ги направите дома од оние продукти кои веќе ги имате.
Како што си правите маски за лице, така треба да правите и за рацете. Една многу квалитетна маска ќе ја направите по следниов начин – две лажици овесно брашно и по една чаена лажичка масло од авокадо, лимонов сок и глицерин. Смесата се нанесува на рацете и се навлекуваат ракавици. Оставете да делува најмалку еден час.
Ако кожата на рацете ви е многу груба, ќе ви препорачаме друга рецепта. Потребен ви е еден голем компир кој се вари и потоа пасира. Кон тоа додадете пресно млеко и малку сварен зелен чај. Смесата се нанесува на рацете и се остава да делува 15 мин.