Рецепт на неделата: Бисквит торта со кокос

Брза, едноставна, кремаста, лесна и вкусна – бисквит торта со кокос која не се пече и се подготвува многу брзо. Доколку сакате нешто слатко и немате премногу време, оваа торта е вистинскиот избор.

 

СОСТОЈКИ:

 

• 4 дл млеко
• 150 гр шеќер
• 1 кесичка пудинг од ванила
• 100 гр кокос
• 100 гр путер или маргарин
• 1 кесичка шлаг (бел шлаг)
• 120 мл млеко
• 150 гр кршени бисквити
• 75 мл млеко
• 1 лажичка рум арома

 

ПОДГОТОВКА:

 

Ставете 3 дл млеко и шеќер да зовријат, а пудингот изматете го во 1 дл млеко.

 

Гответе го пудингот на вообичаен начин. Во врелиот пудинг измешајте ги кокосот и путерот/маргаринот.

 

Мешајте додека не се соединат сите состојки.

 

Ставете го филот во фрижидер. Измешајте го шлагот во изладениот фил.

 

Искршените бисквити посипете ги со млеко и рум арома, па измешајте ги во филот со кокос.

 

Тавата за леб (или друга по избор) покријте ја со фолија, истурете ја смесата, израмнете и оставете во фрижидер да се стегне (по можност преку ноќ).

 

Свртете ја тортата на послужавник, извадете ја фолијата и декорирајте по желба – со чоколадна глазура, шлаг, кокос…

 

Нашиот избор е чоколадна глазура.