ЕМА сè уште без препорака за четврта доза од вакцинацијата

АМСТЕРДАМ – Европската агенција за лекови (ЕМА) наведува дека сè уште нема податоци за „потребата и важноста“ од примање на четвртата доза од постоечките вакцини против Ковид19 кај општата популација.

 

Европскиот регулатор за лекови остава простор за промена на препораката кога станува збор за четвртата доза, но ги повикува и фармацевтските компании да работат на ажурирање на составот на постоечките вакцини против Ковид-19.

 

„Производителите на вакцини се охрабруваат не само да работат на ажурирање на ефикасноста на вакцините на сојот Омикрон, туку и да размислуваат за развој на биовалентни или повеќевалентни вакцини кои би биле ефикасни против повеќе видови на коронавирус и поефикасни од постоечките едновалентни вакцини“, вели д-р Марко Кавалери.

 

На редовната прес-конференција во седиштето на ЕМА, тие наведуваат дека епидемиолошката состојба ширум Европа е „загрижувачка“, особено во однос на зголемениот број на заразени лица кои предизвикуваат доминантен и екстремно пренослив вид на коронавирусот Омикрон.

 

„Иако Омикрон покажува способност да го „заобиколи“ имунолошкиот систем добиен со вакцинација, сегашните вакцини продолжуваат да обезбедуваат значителна заштита од хоспитализација и тешки болести, особено по примањето на засилена доза“, вели Кавалери.

 

Тој додава дека досега само 40 отсто од возрасните во ЕУ примиле бустер доза, а околу 20 отсто од Европејците немаат ниту целосна примарна вакцинација.

 

И покрај тоа што ЕМА ги повикува сите кои можат да добијат бустер да го сторат тоа што е можно поскоро, се нагласува дека добивањето повеќе бустер дози во краток временски период не би било одржливо долго време.