Најздравите луѓе на светот живеат во рибарското село во подножјето на Алпите, „Limone sul Garda“! Ова место во северна Ломбардија, на брегот на езерото Гарда, има едвај повеќе од 1.000 жители, но веќе 40 години е во центарот на вниманието на лекарите и научниците бидејќи е дом на најдолговечните луѓе во светот.
Имаат одлично варење, кое ги штити од проблеми со срцето и дебелина, а научниците делумно објаснија и зошто. Многу локални жители имаат низок (HDL) холестерол. Со оглед на тоа дека ова е добар холестерол, тоа што е низок може да предизвика здравствени проблеми, но не и за жителите на ова село, објаснува Чезаре Сиртори, професор по клиничка фармакологија на Универзитетот во Милано.
– Нискиот добар холестерол е лош за човекот и доведува до проблеми со срцето и мозочен удар. Но, врз локалното население има позитивен ефект. Дури 99 отсто од протеинските генетски мутации предизвикуваат болести, но оваа го утврди отсуството на васкуларни заболувања кај носителите. Нивниот ген содржи посебен протеин кој ги уништува мастите и ја разредува крвта – вели Сиртори.
Не се знае како дошло до тоа. А интересно е што ова село е најсеверното место во светот каде лимонот се одгледува природно и има исклучително блага клима. Жител на селото, Антонио Жирарди, поврзува специфични гени со тоа.
– Климата може да биде топла во текот на целата година и можеби тоа е причината. Никогаш немаме снег или мраз, поради што со векови растат лимони во овој северен дел. Или можеби тоа е благодарение на извонредното екстра девствено маслиново масло и свежата риба што ги јадеме – објаснува Жирарди.
Интересно е што жителите на околните села го немаат овој ген. Од 1.000 жители во Лимон, половината се родени таму, а 60 го имаат генот, додека десетина се постари од 100 години. Еден од носителите на генот е Џани Сегал и целото негово семејство.
-Мајка ми има 96 години и е сосема здрава и психички и физички. Од осумдесетите даваме крв на тестирање. Еднаш ми дадоа толку многу слатка и мрсна храна и ми се слоши, а крвта ми ги уништи маснотиите веднаш – објаснува Сегал.
Неговиот син Џулијано вели дека никогаш во животот немал болки во стомакот.
– Стомакот никогаш не ме боли и јадам што сакам. Сакам пржена и похована храна, салами, а сакам и да пијам. Спијам како бебе – заклучува помладиот Сегал.