Следниот филм на Вуди Ален може да биде и негов последен: „Возбудата исчезна“

– Не е исто. Не ми е толку пријатно – рекол Ален

Вуди Ален навестил дека неговиот 50-ти филм, драма што ќе се снима во Париз овој август, може да биде последен.

Во разговор со Алек Болдвин преку Инстаграм, режисерот признал дека неговата страст за снимање филмови почнала да избледува и дека повеќе не му е пријатно.

– Возбудата исчезна. Сега правиш филм и добиваш неколку недели во кино, а потоа оди на стриминг или плаќање по преглед. Не е исто. Не ми е толку пријатно – рекол Ален.

Ален, исто така, се осврнал на пандемијата на корона вирусот и како продолжената пауза од индустријата му овозможила повторно да ја процени својата ситуација.

– Кога дојде пандемијата, бев во мојата куќа, скаменет како и сите други, се скрив под креветот – вели Ален и додава:

Си помислив: Боже, ми се допаѓа под креветот. Не морам да излегувам и не морам да снимам филмови, на зима да ми е ладно, а на лето жешко и не морам да носам одлуки по цел ден – рекол Ален, пренесува „NME“.