Американецот Том Форд моментално е еден од најпочитуваните дизајнери во светот. Поранешниот креативен директор на модните куќи Гучи и Ив Сен Лоран лансираше сопствен бренд во 2005 година. Во меѓувреме се испроба и во режија, снимајќи ги познатите филмови „A Single Man“ и „Nocturnal Animals“, а моментално е извршен директор на Американскиот совет на модни дизајнери.
Форд е познат по својот софистициран стил, кој е инспирација за многумина во секојдневното носење. Во текот на својата кариера, тој често споделуваше совети во интервјуата како да развиете сопствен стил, а подолу можете да прочитате 10 од нив кои сигурно ќе ви помогнат да се чувствувате добро во вашата кожа и облека.
1. Никогаш не носете нешто во што не се чувствувате удобно бидејќи тоа чувство ќе го проектирате на другите луѓе. „Луѓето секогаш ме прашуваат зошто толку често носам црно. Затоа што се чувствувам удобно и самоуверено во тоа,“ вели тој.
2. Сексапилот доаѓа од начинот на кој се движите и носите, а не од кратките здолништа и топови со длабоко деколте.
3. Не дозволувајте модата да ви диктира што ќе облечете. Направете го тоа што го носите по свое. Вели дека секогаш е малку тажен кога ќе види жена од глава до пети облечена во изглед од модната писта.
4. Телата се менуваат, изгледот се менува, сè се менува. Така, на секои пет години извадете ја целата облека и проценете дали сè уште ви одговара.
5. Парфемот е уште поважен од облеката. Мирисот е директен стимулатор на сите сетила, ги провоцира, буди емоции и спомени.
6. Секоја жена има потреба од барем еден мал црн фустан. Никогаш не знаете кога ќе треба да одите на интервју за работа, погреб или свадба. Црното можеби не е пожелно на свадби, но зошто да не експериментирате.
7. Најдете ја вашата униформа. Ако имате пет комбинации кои сакате да ги носите, во кои секогаш се чувствувате добро, кои се удобни и лесни за работа, тогаш зошто би ви требала друга облека? Да, ви требаат варијации на тема бидејќи не сакате да го носите истото секој ден, но важно е да разберете каков е вашиот изглед.
8. Никогаш не носете нешто само затоа што некој друг ви рекол дека морате. Важно е да го пронајдете вашето чувство за стил.
9. Не ја потценувајте моќта на шминката. Со неа можете да бидете што сакате, да станете нов лик. Шминката е одличен начин да се изразите, а за тоа не мора да ви требаат многу пари. Доколку се одлучите за црвен кармин, со него не ви треба речиси ништо на очите, можеби само малку маскара.
10. Опуштете се. Стилот и модата треба да го збогатат вашиот живот, а не да ви создаваат стрес. Ќе изгледате најдобро кога ќе бидете мирни.