Телото на секоја жена е различно, а тоа вклучува еден од најсложените процеси во телото – менструалниот циклус и менструалното крварење. Во просек, циклусот трае околу 28 дена, а самата менструација околу пет, но секоја жена има свој ритам и начинот на кој функционира нејзиниот циклус, па за некои е нормално да добиваат менструација на секои 40 дена.
Кога циклусот е неправилен – се менува интервалот помеѓу менструациите, сте забележале значително повеќе или помалку обилно крварење од претходно, само крварењето трае прекратко или многу долго, обично се сомневаме на нарушување. Меѓутоа, во голем број случаи причините можат да бидат дури и (донекаде) безопасни и со текот на времето се се враќа во нормала. Ова се некои од нив.
Недостаток на спиење
Лекарите постојано ја нагласуваат важноста на квалитетниот сон, кој влијае на метаболизмот, имунолошкиот систем, општата рамнотежа и здравјето на целиот организам, регенерацијата и одморот на телото итн. Доколку нема доволно сон, тоа доведува до низа последици како замор, нервоза, намален имунитет, зголемен апетит… па дури и менструални нарушувања!
Научно е докажано дека на човечкото тело му требаат околу осум часа сон дневно, па ако не успеете да му обезбедите на телото толку многу сон – време е да ја промените вашата дневна рутина и да си легнете порано!
Патување
Секое долго патување има влијание врз човечкото тело. Добро е познато дека џет-лагот, краткотрајно пореметување предизвикано од промена на временските зони, предизвикува раздразливост, чувство на замор и несоница, а една од последиците од подолгите патувања може да биде и промена на менструалниот циклус. Обично се нормализира многу брзо, во рок од неколку дена.
Стресот
Иако не е толку безопасен како претходните две ставки, стресот е дефинитивно една од причините за здравствени проблеми кои можеби не ги сфаќаме доволно сериозно или барем не се справуваме доволно за да го елиминираме. Бројни истражувања ги докажале негативните ефекти на стресот врз организмот, а меѓу нив е дека може да предизвика нарушувања во менструалниот циклус и менструацијата.
Имено, прекумерниот стрес влијае на хипоталамусот, делот од средниот мозок кој ја координира работата на жлездите на ендокриниот систем, ги регулира емоциите и хормоните, па изменетата активност во ова тело може да влијае на циклусот. Доколку сте забележале промена, а неодамна сте доживеале отказ, раскинување или некоја друга стресна ситуација, можно е тоа да е виновникот за вашите проблеми.