Емисијата на штетни гасови е голем проблем на многу градови, а еден од начините за борба против тоа е ограничување на пристапот на автомобилите до центарот на градот.
Од следната година Милано би можел да го ослободи центарот на градот од автомобили, пренесува Klima101.
Но, ова е само еден од низата градови кои се свртуваат кон забрани за автомобили за да ги намалат штетните емисии и загадувањето.
Концентрациите на ПМ 2,5 честичките во Милано се четири пати повисоки од препорачаните од Светската здравствена организација како безбедни. Вака овој италијански град се најде на неславната листа на најзагадени градови во Европа, а дел од проблемот е и сообраќајот.
Сепак, ова може да се промени во иднина, пишува City Magazine.
Имено, како што најави градоначалникот Џузепе Сала, Милано планира да ги забрани автомобилите во центарот на градот, а овој подвиг би можел да биде проследен и со други слични реформи.
„Тоа е мала работа, но во исто време – историска“, рече градоначалникот за време на неодамна одржаниот фестивал за промоција на одржливоста.
Доколку добие зелено светло, веќе следната година треба да стапи на сила забраната за автомобили во центарот на Милано. Со цел да се следи дали возачите ги почитуваат правилата и да се спречи влез на приватни возила во центарот на градот, на Corso Venezia ќе бидат поставени камери за надзор.
Прекршителите ќе се соочат со парична казна, но градоначалникот не прецизираше колку точно ќе изнесува.
Од забраната се изземени такси возилата, јавниот превоз, жителите со гаража и сите кои имаат пристап до паркинг.
Иницијативата треба да го направи Милано попријателски за пешаците, вклучувајќи ги и модните улици. Според градоначалникот, продавниците ја поддржале забраната за автомобили, па дури и предложиле да се оди чекор понатаму и зоната да биде целосно пешачка.
Забраните за автомобили во центарот на градот не се новина.
Гент во Белгија почна да ослободува површина од 35 хектари од загадувачки автомобили уште во 1996 година. Оваа забрана, над дваесет години подоцна, го направи центарот на градот покорисен за пешаците и велосипедистите, а сообраќајниот метеж одамна го нема.
И главниот град на Шведска, Стокхолм, неодамна објави забрана за дизел и бензински автомобили во центарот на градот со цел да се намалат штетните емисии и загадувањето. Примената на правилата е најавена за 31 декември 2024 година.
Парис го следеше примерот, најавувајќи воведување зона без автомобили. Спроведувањето на овие планови е одложено, но се очекува забраната да стапи на сила пред Олимписките игри, кои следната година се одржуваат во француската престолнина.