Езерскиот округ, планинска област на северозападот на Англија и најголемиот национален парк во земјата, е рај за љубителите на природата кои можат да пешачат со часови и часови истражувајќи ги бајковитите патеки со поглед на драматични карпи, како и уживајќи во кадрите создадени од играта на густата магла, облаците кои се здружуваат со планинските врвови рефлектирани во мирни езера.
Пред пет години и УНЕСКО ја препозна вредноста на тој пејзаж, чија убавина неуморно ја забележуваа писателите и сликарите преку нивните дела.
Тука се и најголемите англиски езера, од кои најголемо е Виндермер и највисоките англиски планини, од кои највисока е Скафел Пајк.
Селото Грасмер и блиската Рајдал Вотер е одлична почетна точка за истражување на езерската област. Грасмер е уникатно село со прекрасни плоштади и патеки со традиционални куќи од 18 и 19 век, како и дом на одлични пабови, неверојатна книжарница каде доаѓаат љубителите на мапите и планинската литература, како и поранешниот дом на поетот Вилијам Вордсворт, чија куќа и денес стои на работ на селото, опкружена со падини и шума. Еден познат поет зборуваше за Грасмер како „најубавото место што човекот некогаш го нашол“.
Во 1891 година, нешто повеќе од 40 години по неговата смрт, куќата за прв пат била отворена за јавноста, а со текот на времето почнала да привлекува сè поголем број посетители. Во последно време, десетици илјади луѓе го поминуваат нејзиниот праг секоја година.
Покрај историјата, можете да ја истражувате и локалната кујна во Грасмер, од миризливи десерти со џем и крем, пита со лимон, чаден лосос и пржени јајца до реребит – леб паниран со мешавина од сирење.
Неколку стотици метри јужно од селото се наоѓа езерото Грасмер, по кое можете да одите или да се упатите кон планините кон Скидау, Хелвелин, Скафел Пајкс и Лангдејл Пајкс.
