Како дел од иницијативата за поттикнување на туризмот и привлекување посетители, владата на Хонг Конг објави план за доделување дури 500.000 бесплатни авионски билети.
Иако неодамна беше објавена, иницијативата симболично наречена „Hello Hong Kong“ е плод на двегодишна работа.
Бесплатни билети за Хонг Конг ќе бидат достапни на три авиокомпании – Cathay Pacific, HK Express и Hongkong Airlines. Сето ова градот ќе го чини 254,8 милиони американски долари, посочува „Greekreporter“.
Како да добиете бесплатни билети?
Секој што сака да си ја проба среќата мора да се регистрира на официјалната веб-страница на аеродромот во Хонг Конг и да ги остави бараните информации.
Извлекувањето на среќните добитници ќе се организира во три наврати.
Првиот ќе биде во март и е наменет исклучиво за жителите на Југоисточна Азија. Втората рунда извлекувања е закажана за април и е наменета за луѓето кои живеат во континентална Кина, додека третата и последна рунда е закажана за мај и е наменета за луѓето од другите делови на светот.
Дел од влезниците ќе можат да ги добијат жителите на Хонг Конг, а извлекувањето за нив е планирано за 1 јули годинава.
Иницијативата „Hello Hong Kong“ е дел од напорите да се вратат посетителите во градот по пандемијата.
За потсетување, Хонг Конг беше многу внимателен за време на пандемијата на корона вирусот, па откажувања на летови започнаа веќе по првите извештаи за инфекција во Вухан, Кина.
Споменатиот грчки портал се повикува на податоци на Си-Ен-Ен, според кои, во периодот пред пандемијата, Хонг Конг во текот на годината го посетиле 56 милиони туристи, додека во изминатата година тој број бил само 100.000.
Токму благодарение на оваа иницијатива, претставниците на Хонг Конг изразуваат надеж дека на овој начин би можеле да привлечат ист број посетители како и во периодот пред почетокот на пандемијата.