Честопати на патувања можеме или да бидеме супер задоволни со јавниот превоз и да им се восхитуваме на градовите каде што не се чека подолго од пет минути, а честопати можеме да полудиме и да се прашуваме, каде е тој автобус, метро, воз или нешто друго. Затоа, порталот „Тајмаут“ се потруди и го истражи, со помош на локалните жители, задоволството од јавниот превоз во 19 светски градови, а Берлин излезе на врвот!
Дури 97 отсто од жителите на Берлин се воодушевени од транспортната мрежа на нивниот град, бидејќи нивното метро (U-Bahn) им нуди на патниците 175 станици на девет линии лесни за навигација. Градот има и одлично организиран S-Bahn, систем на урбани и приградски железници кои ги поврзуваат предградијата со срцето на градот.
Второто место го зазеде чешкиот главен град Прага, со 96 отсто од локалните жители кои изјавија дека е лесно да се движат низ нивниот град со јавен превоз. Сите сме ги виделе класичните фотографии од Прага со црвено-бели трамваи, но градот има и импресивно метро. Се разбира, не е толку големо како Берлинското, но е прилично добро.
Токио го заслужи третото место, а ако сте виделе некое од виралните видеа кои покажуваат колку локални жители користат јавен превоз во градот, веројатно ќе се согласите дека главниот град на Јапонија заслужува признание. Не само што јавниот превоз е брилијантно одржуван и лесен за навигација, туку станува сè попријатен за користење за оние кои не зборуваат јапонски, што порано беше проблем.
Во првите десет се и Копенхаген, Стокхолм, Сингапур, Хонг Конг, Тајпеј, Шангај и Амстердам.