Мултинационалната Држава Боливија или едноставно Боливија е една од земјите на Јужна Америка и се наоѓа во нејзиниот централен дел.
Кога ќе се земе предвид дека Империјата на Инките, нацијата која се сметаше за најнапредна во периодот пред доаѓањето на Колумбо, се наоѓала делумно на територијата на денешна Боливија, сосема е јасно дека станува збор за земја со исклучителен потенцијал.
За жал, стапката на сиромаштија во земјава е 53 отсто, а според „Википедија“ индексот на човековиот развој во оваа демократска република е на просечно ниво.
Иако не може да се каже дека туристичкиот потенцијал на земјата, позната и по врвовите на Андите, е доволно искористен, нема сомнеж дека Боливија има што да им понуди на посетителите.
Езерото Титикака, бројните национални паркови и колонијални градови, но и можноста за уживање во карневалите се само дел од туристичките атракции на оваа земја.
Земја за љубителите на авантурите
Нема сомнеж дека љубителите на авантуристички патувања во Боливија ќе уживаат. Доволно е да се споменат врвовите на Андите и амазонската џунгла, за зависниците од адреналин да ја забележат оваа дестинација.
Познатата долина Ујуни крие многу интересни атракции, а Солените полиња се само една од нив. Тоа е и најпопуларната боливиска дестинација, за што помага и фактот што Ујуни може да се пофали и со Гробиштата на возот, островот Инкауаси и бројните лагуни, од кои зелената лагуна или лагуната Верде е најинтересна за туристите. Дефинитивно треба да ја посетите лагуната Колорадо, специфична по црвената боја на водата и Хедионда, вулканско езеро чие име се преведува како Смрдлива лагуна. Поради високата содржина на гас, пушењето е забрането во непосредна близина на езерото.
Карпестата формација, чија форма многу наликува на дрво, е една од карактеристиките на овој регион. Дрвото на карпата е едно од омилените фото места за многумина кои ја посетуваат Боливија.
Запознавање со Амазон
Бидејќи поголемиот дел од боливискиот регион на Амазон е неистражен, нема сомнеж дека авантуристите ќе уживаат тука. Во горниот слив на реката Амазон, Националниот парк Мадиди работи од 1995 година.
Се смета за еден од биолошки најразновидните во целиот свет, бидејќи е дом на пет до шест илјади растителни видови. Самиот национален парк ја покрива областа од Андите до Амазон и е многу популарен меѓу туристите кои ја посетуваат Боливија.
Во него, меѓу другото, можете да сретнете и автохтони тити мајмуни, како и џиновски видри и јагуари.
А сето тоа е само дел од бројните убавини кои ги крие оваа земја.
