Кога првпат почнавте да патувате, мајка ви веројатно ви го дала златниот совет секогаш добро да се грижите за вашиот паричник. Дека, на пример, не треба да го носите во задниот џеб и слично. Па, тој совет особено треба да се слуша при посета на одредени туристички дестинации на стариот континент…
Џепчиите секогаш демнат, а според истражувањето направено од британскиот портал Quotezone.co.uk, најголеми се шансите, барем ако сте Британци (но веруваме дека би било така и за другите), ќе се пронајдете себеси мета на џепчии во Италија, потоа Франција, но и во Холандија.
Истражувањето се засноваше на бројот на спомнувања на џепчии во туристичките прегледи на главните атракции на секоја земја. Иако Барселона често се смета за жешка точка за џепчии, Шпанија не влезе во првите пет. Сепак, се чини дека најлошо е на „чизмата“, каде крадците постојано „оперираат“ околу неколку големи туристички атракции.
Римскиот Колосеум, Фонтаната Треви и Пантеонот беа споменати како места каде туристите доживеале кражба. Истражувањето на money.co.uk открило 2.206 критики кои споменуваат џепчии на фонтаната Треви во Рим.
Иконската фонтана е една од најважните атракции во Рим и обично е полна со туристи кои фотографираат. Туристите треба да бидат свесни за вообичаените измами кои би можеле да се користат како техники за одвлекување на вниманието. Џепџиите кои работат во парови можат да користат еден измамник за да го задржат вниманието на туристите додека другиот краде од нивните џебови.
Областа околу Миланската катедрала и галеријата Уфици во Фиренца е исто така полна со џепчии. Франција го зазеде второто место на листата, а Ајфеловата кула беше спомената како особено критично место. Холандија беше третото најлошо место во Европа за џепчии, додека Германија беше четврта. Грција е петта најлоша дестинација, а потоа следат Шпанија и Португалија на шестото и седмото место. Пешачката улица во Барселона, познатата Рамбла, претходно беше рангирана како место со најголема веројатност да останете без вредните работи.
Сега кога го знаете ова, широко отворете ги очите кога сте во близина на одредени атракции. Освен тоа, можеби скап часовник или вреден накит во тој момент можеби треба да „украси“ безбеден сеф отколку вашиот зглоб или прст. Едноставно, бидете внимателни бидејќи и самите знаете дека претпазливоста е мајка на мудроста.