Три нови модели на фармерки на кои им се предвидува голема популарност

Кога станува збор за секојдневната облека, фармерките несомнено се меѓу најбараните. Тие се основата на нашите секојдневни комбинации, парче без кое повеќе не можеме да ја замислиме нашата гардероба. Одредени модели на фармерки од година во година го задржуваат своето место на врвот на најпопуларната листа, но секоја нова сезона ни носи и некои трендовски модели кои владеат со street style изданијата.

Какви модели ќе бидат овие најмногу зависи од комерцијалните брендови кои црпат инспирација од колекциите претставени на модните недели. Судејќи според моменталната понуда, модните познавачи беа во право кога предвидуваа голема популарност за овие модели во наредните месеци.

1. Карго фармерки

Моделите на панталони инспирирани од војничкиот стил веќе некое време се голем хит, а главна карактеристика им се џебовите, кои сега се префрлија и на фармерките. Моделите на карго фармерки веќе се многу популарни меѓу светските трендсетерки кои со својот стил ги инспирираат жените ширум светот, па прашање на време е кога оваа варијанта на фармерки ќе доминира во уличните стилски комбинации.

2. Фармерки со пруги

Пред неколку години видовме фармерки со апликации кои беа вистински must have. Потоа дојде до заситеност на апликациите и тие полека беа заменети со разни дезени. Оваа сезона ќе се носат фармерки со дезен на пруги, кои ретко ги гледаме на ваков тип на панталони.

3. Беж фармерки

Сините фармерки се безвременско парче кое никогаш не излегува од мода, но во наредните месеци беж фармерките ќе се обидат да ги надминат. Токму моделите во беж нијанси беа најавени како потенцијален хит. Беж нијансите се многу разновидни и практични поради нивната приспособливост, па нема сомнеж дека беж фармерките ќе го најдат патот до љубителите на модата.