Passage du Gois е пат кој се наоѓа во западниот дел на Франција и го поврзува копното, поточно градот Beauvoir sur Mer со островот Noirmoutier, односно со селото Barbâtre на тој остров. Минува низ заливот Baie de Bourgneuf, едно од најважните места за берба на остриги во регионот, долг е нешто повеќе од четири километри, а посебен е по тоа што е двапати дневно – го нема, т.е. е покриен од морето.
Кога ќе дојде плимата, патот останува метар и пол до дури четири метри под морето. Токму затоа е опасен. Иако светлосните сигнали се поставени по целата негова должина и постојано се повикуваат возачите да ја проверат состојбата – секогаш има и такви кои не слушаат или се убедени дека се побрзи од плимата. Секоја година се преземаат од 15 до 30 акции за спасување на оние кои не биле доволно брзи. Патот понекогаш е делумно под море и поради бранови. Имајте на ум дека е многу лизгаво, било поради тоа што е влажно, поради калта што се таложи на него и затоа што често е магла.
Првото спомнување на патот Passage du Gois, потоа опасен пешачки премин низ заливот, датира од 9 век. За прв пат е одбележан во 1819 година, а неколку години подоцна биле поставени кули за спасување каде што би можеле да се засолнат оние што ги фатила плимата и тие се таму и денес – со истата функција.
Патот бил од витално значење за населението на островот, па на почетокот на 20 век годишно преку Passage du Gois поминувале околу 600 коњи, 600 крави, 100 автомобили и повеќе од 12 илјади пешаци. Иако мостот што го поврзува Ноармутие со копното бил изграден во 1971 година, овој пат сè уште останува многу фреквентен и посетен поради неговата атрактивност. Денеска низ него поминуваат повеќе од илјада возила дневно, а речиси две и пол илјади во лето.
Бидејќи туристите можат да бидат невнимателни, локалните власти дури се договорија со некои даватели на услуги за навигација со автомобили дека овој пат не треба да се препорачува, а со цел да се зголеми безбедноста на овој необичен морски премин, на официјалната веб-страница можете да ги најдете сите информации за состојбата на патот, коефициентот на плима, очекуваното време на плима во текот на годината и можете сами да проверите како е во овој момент – на снимка во живо.
Passage du Gois и неговата околина се засолниште за многу видови на флора и фауна, а најпознати се по остригите собрани овде. Од 2017 година, тие се класифицирани како области од национален интерес и природни споменици, а љубителите на трчањето ќе препознаат дека трката Foulées du Gois се одржува тука со децении, каде што повеќе од илјада тркачи се тркаат со времето и плимата.