Шекил О’Нил ги загрижи фановите со фотографија од болнички кревет

Еден од најдобрите кошаркари на сите времиња ги загрижи своите фанови со неодамна објавената фотографија од болничкиот кревет, но набрзо се разјасни. Поранешната НБА ѕвезда Шекил О’Нил имаше операција на колкот и се пошегува дека никој не треба да се грижи за неговото здравје затоа што тој само си го подигнал задникот со сопственото сало, таканаречена BBL процедура.

i’m always watching @TurnerSportsEJ and @Candace_Parker miss y’all pic.twitter.com/4tY4X6v1Pj

— SHAQ (@SHAQ) March 19, 2023

Тој навести дека имал здравствени проблеми кон крајот на минатата година кога кажа дека поради лошите тестови на крвта морал да ослабне најмалку 30 килограми до својот 51 роденден кој го прославил на 6 март. Тогаш тој призна дека успеал да отстрани само 18. Овој 2,16 метри висок џин, кој тежел околу 140 килограми во деновите на неговата спортска слава, по повлекувањето од спортот се здобил со значителна количина на вишок килограми што му предизвикало здравствени проблеми.

Тој рече дека во текот на спортската кариера не внимавал што јаде, а кога престанал да се занимава со спорт, навиката за лошо јадење останала, а физичката активност изостанала, па килограмите само се натрупале. Во последните месеци се откажал од газираните сокови и лебот, пие здрави смути и зема додатоци во исхраната. Во секојдневието го вовел пешачењето по најмалку половина час дневно, кое им го препорача на сите гледачи на телевизиското шоу Entertainment Tonight, во кое гостуваше во пресрет на неговиот роденден.

Колкот сега е заменет, а борбата со вишокот килограми останува. На шега изјави дека би сакал да има линија како неговите слаби синови Шареф и Шаќир, на кои им ја пренел љубовта кон кошарката, па да сними со нив реклама за долна облека.