Трепнете еднаш, а тој веќе се променил – Сиетл е баш таков, ефемерен и краткотраен, променлив и напреден.
За аутсајдерите, Сиетл е креатор на микро брендови, додека за инсајдерите, односно оние кои добро го познаваат, овој град е местото каде што се раѓаат и создаваат легендите, односно место каде што еден ден можете да уживате во кафето, следниот ден можете уживајте во домашното пиво, а ден потоа во најновите трендовски книги, сите на една локација. Сиетл е градот од кој се појавија бројни светски трендови кои се уште се силни и денес – од музика, преку слаткарници, микро дестилерии, домашен сладолед и нано-пиварници. Прошетајте по улиците на овој град и ќе видите друга страна на Америка, подалеку од Старбакс и трговските центри.
Ако сте во овој град за прв пат, подгответе се за искуство кое ќе ги допре сите ваши сетила. Ве советуваме да го посетите маркетот Pike Place, основан во 1907 година, кој и денес собира голем број луѓе секоја недела кои уживаат во домашните оброци. По неколку минути поминати овде, ќе сфатите дека сте дошле во гурманскиот рај, каде експерименталните готвачи создаваат спој на американската кујна со се и сешто, се додека таа е локално одгледувана.
Сиетл е неверојатен спој на култури, нации и традиции што не можете да ги видите никаде на друго место. Го има својот луксузен крај, елегантниот дел, кул и урбан дел, чудниот и независен скандинавски крај, како и адолесцентниот кој сè уште не се пронашол. Ако не го посетите секој од овие делови на градот, нема да можете да го разберете Сиетл и целата негова магија.
Иако технолошките гиганти Мајкрософт и Амазон пораснаа во Сиетл, тоа не значи дека овој град ја нема својата уметничка страна. Ако сте љубители на музиката од деведесеттите, тогаш сигурно знаете кои музички групи потекнуваат од овој град и какво влијание имале врз остатокот од светот.
Овде можете да посетите музеј во форма на скршена гитара, статуа на Владимир Ленин, мурал направен од гуми за џвакање и музеј посветен на антички флипери. Околу секој агол, овој град ви нуди нешто ново и нешто досега невидено. Ако го посетите, ќе разберете дека е рај за боемите и хедонистите, односно за луѓе како оние кои со својата музика во изминатите години создаваа субкултури и моќни движења, чии имиња и денес ги паметиме.