Која е разликата меѓу омега-3, омега-6 и омега-9 масните киселини?

Сите имаат здравствени придобивки, но важно е да се постигне правилен баланс меѓу нив.

Што се омега-3 масните киселини?

Омега-3 масните киселини се полинезаситени масти, вид на масти кои вашето тело не може да ги произведе. Терминот „полинезаситени“ се однесува на нивната хемиска структура, бидејќи „поли“ значи многу, а „незаситени“ се однесува на двојни врски. Бидејќи човечкото тело не може да произведе омега-3, овие масти се нарекуваат „есенцијални масти“, што значи дека мора да ги внесувате од вашата исхрана. Американското здружение за срце (АХА) препорачува да се јаде најмалку две порции риба неделно, особено масна риба, која е богата со омега-3 масни киселини.

Омега-3 масните киселини можат да помогнат во управувањето со нивото на холестерол, триглицериди и крвниот притисок, да го поддржат менталното здравје, да имаат позитивен ефект врз намалувањето на тежината и големината на половината и да се борат против воспалението во телото.

Масната риба е најдобар извор на омега-3. Други морски извори вклучуваат масла од алги. Може да се најде и во јаткастите плодови. Не постојат официјални стандарди за дневен внес на омега-3, но различни организации нудат упатства. Повеќето експерти препорачуваат внесување од 250-300 милиграми дневно, пренесува Healthline.

Што се омега-6 масните киселини?

Како и омега-3, омега-6 масните киселини се полинезаситени масни киселини. Омега-6 масните киселини се исто така есенцијални, па затоа мора да ги внесувате од вашата исхрана. Тие главно обезбедуваат енергија. Најчестите омега-6 масти е линолеинската киселина, која телото може да ја претвори во подолги омега-6 масти како што е арахидонската киселина (АА).

Високо ниво на омега-6 масти се присутни во рафинираните растителни масла и храната зготвена во растителни масла. Јаткастите плодови и семките исто така содржат значителни количини на омега-6 масни киселини. Според Одборот за храна и исхрана на Американскиот институт за медицина, адекватниот дневен внес на омега-6 е 17 грама за мажи и 12 грама за жени на возраст од 19 до 50 години, пренесува Healthline.

Што се омега-9 масните киселини?

Омега-9 масните киселини се мононезаситени. Тие не се строго „суштински“, бидејќи телото може да ги произведе. Омега-9 мастите се вообичаени во растителните масла, јаткастите плодови и семките.