Се појави нов тренд во туризмот: Се повеќе аранжмани на светот нудат „патување во тишина“

Дали ви се допаѓа тишината? Денешниот свет постојано ги бомбардира сите наши сетила, звукот е еден од најприсутните сетилни дразби.

Навистина, живееме во бучен свет кој остава се помалку простор за она што обично го нарекуваме „заскитани мисли“. Секакви содржини постојано се околу нас, така што имаме се помалку можности да бидеме со себе, во тишина. Затоа, не е чудно што списанијата посветени на луксузниот туризам како Conde Nast Traveler – (CNT) го истакнуваат овој тренд како еден од најважните што се појавил во туризмот во последните години.

Се разбира, не станува збор за желбата да се избегнуваат луѓето и комуникацијата. Овој вид на патување има и здравствени придобивки, бидејќи бучавата често создава стрес, особено кога не можеме да ја контролираме.

CNT наведува дека некои студии го поврзуваат загадувањето со бучава со различни здравствени проблеми како депресија и кардиоваскуларни болести. Од друга страна, поминувањето време во тишина ни помага да се чувствуваме подобро за нашите мисли и чувства, го намалува стресот и ја поттикнува креативноста.

Според вообичаените дефиниции, патување во тишина би било она кое преку одвојување од околината помага да се поврзете со природата и со себе. Ако ништо друго, после тој вид на опуштање – наспроти брзањето од атракција до атракција – сигурно нема да ви треба пауза по вашиот „одмор“.

Уживањето во тишината не е нов феномен. Можеме да го поврземе и со медитацијата карактеристична за будизмот, поради што денес можеме да најдеме различни понуди за годишни одмори во медитативна средина, насекаде низ светот. Велнес секторот нашироко го прифати овој облик на релаксација, но тој е во еден вид конфликт со оригиналните форми на медитација поврзани со духовноста на источните религии. И многу поедноставен за да се доближи до западниот потрошувач.

За среќа, постојат и други форми на овој вид на патување, кои покрај личниот развој, ја користат и животната средина како една од најодржливите форми на патување.

Тоа се искуства како што се медитација, уживање во изолирани делови од природата без наметнати звуци, патеки за пешачење, дигитална детоксикација и слично. Ги има насекаде, од Европа, до егзотични дестинации на далечните пацифички острови.

Сепак, треба да се разбере дека тивките патувања не мора да значат целосно отсуство на каков било звук. Поентата, објаснува CNT, е да се потопите во звучната средина околу вас, особено во природата.

Ова може да значи одење во изолација на некоја природна убавина без посетители, пешачење по рути каде што можете да се фокусирате на сопствените мисли без постојано да разговарате со вашите придружници, планинарење, медитација, но и кратко или долго време без компјутер и паметен телефон.

Деловниот дел од туристичкиот свет го најде својот интерес за се, па веќе се отвораат хотели и одморалишта наменети за овој тип на гости.