Прекумерното изложување на сонце нема да ја направи вашата кожа поубава и потемна, туку може само да ви предизвика дополнителни проблеми – изгореници. После тоа останува само црвенило, чешање и печење на кожата. Ако не сакате да бидете „црвени како рак“, избегнувајте прекумерно сончање помеѓу 11 часот наутро и 16 часот, бидејќи тогаш УВ зраците се најсилни, а ако веќе е доцна и вашата кожа настрадала, еве ги советите на дерматолозите.
Имено, дерматолозите сугерираат дека алое верата и кокосовото масло можат да помогнат во ублажување на изгорениците и намалување на лузните предизвикани од премногу изложување на сонце, пишува „Well and Good“. Сепак, дерматологот Гита Јадав, основач на FACET Dermatology, вели дека е важно и кога нанесуваме кокосово масло.
„Ако го нанесете прерано по изгореница, би можеле да ја влошите болната, отечена, изгорена кожа со заробување на топлината. Затоа препорачувам прво да користите алое вера, а потоа кокосово масло“, објаснува таа.
Тоа значи дека ако имате какви било загрижености во врска со изгорената кожа од сонце, одложете го нанесувањето кокосово масло и држете се до ладна алое вера или крема за после сончање.
„Алое верата ѝ овозможува на кожата да дише и најдобро е да се користи првично за изгореници од сонце. Кокосовото масло е подобро да се користи во подоцнежните фази од закрепнувањето од изгореници, кога кожата се лупи“, советува Јадав.