За многу луѓе, чајот е повеќе од обичен пијалок. Пиењето чај често е смирувачки ритуал. Сепак, комбинацијата на чај со одредени намирници може да има негативно влијание врз нашето здравје.
Чајот најчесто се споменува во позитивен контекст – како здрав и смирувачки пијалок во кој уживаме. Но, дали некогаш сте се запрашале дали вашата омилена шолја чај може да ја попречува апсорпцијата на хранливи материи? Излегува дека некои навидум безопасни комбинации на чај и храна може да доведат до неочекувани ефекти.
Ефект врз апсорпцијата на железо
Фармацевтот и нутриционист, Дебора Грејсон, предупредува дека пиењето чај или кафе со храна како црвено месо или зелен зеленчук може да ја намали апсорпцијата на железо. Железото е од суштинско значење за одржување на нивото на енергија, силен имунолошки систем и транспорт на кислород во телото.
Редовното консумирање чај или кафе со оброците може да го спречи телото да апсорбира доволно железо, што може да доведе до анемија, состојба која се карактеризира со тежок дефицит на железо. Жените со редовни менструални циклуси се особено изложени на ризик од анемија поради зголемената потреба од железо. Затоа избегнувајте чај со храна богата со железо, како црвено месо, спанаќ и брокула.
Соединенија кои го блокираат железото
Некои соединенија присутни во чајот и кафето, како што се полифенолите и танините, може да ја попречат апсорпцијата на железото. Полифенолите, кои се наоѓаат и во овошјето, зеленчукот и зачините, можат да помогнат во намалувањето на воспалението, но исто така може да ја попречат апсорпцијата на железото. За овој ефект дополнително придонесуваат танините кои ги има и во виното, како и оксалатите, пренесува Крстарица.