За многумина, лебот е суштински дел од нивната секојдневна исхрана, но за некои, тој предизвикува надуеност по оброкот. Причината може да биде чувствителност на пченица или глутен, што предизвикува непријатни симптоми како што се гасови, надуеност и болки во стомакот. Гастроентерологот д-р Џозеф Салхаб, познат на социјалните мрежи како „Докторот за стомак“, идентификувал неколку видови леб кои можеби се полесни за варење, пишува „Хафингтон пост“.
„Ако лебот ви предизвикува гасови и надуеност, пробајте една од овие алтернативи“, рече тој во видео објавено на ТикТок.
Леб од ‘ртено жито
Првата препорака на д-р Салхаб е леб од ‘ртено жито. Тој е направен од интегрални зрна кои се оставаат да ‘ртат пред мелење.
За разлика од обичниот бел леб и другите производи направени од рафинирано пченично брашно, ова го користи целото жито, а токму процесот на ‘ртење ја прави разликата. Д-р Салхаб објаснува дека ‘ртењето може да ја намали количината на глутен и FODMAP соединенија, кои предизвикуваат надуеност и дигестивни проблеми кај некои луѓе.
Леб од лен
Друга препорака е лебот од лен, кој е направен од мелени семки од лен, кои се богати со растителни влакна и омега-3 масни киселини. Иако не е секогаш лесно да се најде во продавниците, може да се направи многу лесно дома.
Кисел леб
Киселиот леб стана една од најпопуларните алтернативи на класичниот леб во последниве години. Се прави со помош на природен квасец и млечнокиселински бактерии, наместо обичен пекарски квасец. Традиционалниот рецепт содржи само неколку состојки: брашно, вода и сол, додека основата на тестото е таканаречениот стартер, или природно ферментирана култура од брашно и вода.
„Процесот на ферментација помага во разградувањето на дел од глутенот и фруктаните, кои се меѓу најчестите причини за надуеност“, вели д-р Салхаб.
Бидејќи може да се купи во повеќето пекари и супермаркети денес, тој е и најпрактичниот избор за многумина.
Важна забелешка
Иако овие видови леб може да содржат помалку глутен, тој не е целосно отстранет. Затоа, д-р Салхаб предупредува дека тие не се погодни за луѓе со целијакија или алергии на пченица или глутен.
Доколку надуеноста трае подолго од три недели или се повторува често, задолжително посетете лекар. Причината може да не е само лебот, туку и други состојби како што се синдром на иритабилни црева или други дигестивни заболувања.