Властите во Венеција размислуваат да ја зголемат дневната такса за влез за посетителите кои доаѓаат на еднодневни излети до максимум 30 евра, почнувајќи од 2027 година, и да ја применуваат во подолг период од годината.
Предлогот го изнесе Микеле Зуин, градскиот советник за буџет и даноци, кој смета дека сегашната такса од 5 до 10 евра е недоволна за да се ограничи прекумерниот туризам.
„Сегашната такса од 5 до 10 евра е прифатлива за речиси секого. Постои ризик таа повеќе да го нема ефектот на одвраќање што оваа мерка требаше да го постигне“, изјави Зуин за неделното издание на регионалниот дневен весник Il Gazzettino.
Зуин наведе дека за новата цена за 2027 година ќе треба да се разговара и да се постигне договор со националните власти. Тој додаде дека, иако јавно се спомнувало зголемување и до 50 евра, градските власти можеби ќе се одлучат за максимум од 30 евра.
Венеција ја воведе таксата за влез во 2024 година, а таа се однесува само на посетителите кои доаѓаат на еднодневни излети. Оние што резервираат однапред плаќаат пониска цена, а од плаќање се изземени децата на возраст под 14 години.
Во 2026 година, мерката беше на сила во одредени денови меѓу 3 април и 26 јули, конкретно од 8:30 до 16:00 часот. Во градскиот буџет се слеаја повеќе од 5,2 милиони евра од продажбата на нешто помалку од 680.000 билети.
Градските власти наведуваат дека целта на мерката е да се пренасочат посетителите подалеку од периодите со најголема посетеност, како што се празниците околу 1 мај. Венеција со години се соочува со прекумерен туризам и иселување на населението, па новите правила се претставени како обид да се намали притисокот врз историското јадро на градот.