Британски лекар предупреди дека положбата на раката на пациентот за време на мерењето на крвниот притисок е од клучно значење, бидејќи неправилната положба може да доведе до погрешна дијагноза.
Насоките на Националната здравствена служба (NHS) им препорачуваат на пациентите да седат исправено за време на мерењето, при што раката треба да биде потпрена на маса. Експертите предупредуваат дека оваа препорака не се почитува секогаш во прометните клиники, што го зголемува ризикот од погрешна дијагноза.
Дин Егит, лекар од општа пракса во NHS, изјави за „Дејли мејл“ (Daily Mail) дека прецизното мерење на крвниот притисок е клучно за идентификување и лекување на луѓето изложени на ризик од последиците на високиот крвен притисок.
„Прекумерното лекување и несаканите ефекти предизвикани од лековите можат да предизвикаат вистинска штета, особено кај ранливите пациенти“, рече Егит.
Предупредувањето следи по американска студија спроведена од „Џонс Хопкинс Медицин“ (Johns Hopkins Medicine), објавена во списанието JAMA Internal Medicine, која покажа дека положбата на раката прави значителна разлика во добиените вредности.
Ако раката виси покрај телото без потпора, систолниот притисок – горната бројка при мерењето – бил за речиси 7 mmHg повисок. Кога раката била потпрена во скутот, резултатот бил за речиси 4 mmHg повисок.
Експертите објаснуваат дека раката треба да биде поставена на маса или работна површина во висина на срцето. Кога раката виси надолу, мускулите можат да се стегнат и привремено да го зголемат крвниот притисок, додека држењето на раката во скутот го зголемува растојанието меѓу раката и срцето, што исто така може да ги зголеми измерените вредности. Во студијата од 2024 година, истражувачите го мереле крвниот притисок кај 133 возрасни лица на возраст од 18 до 80 години. Пред мерењето, учесниците пешачеле две минути, потоа седеле пет минути, а мерењата биле вршени во интервали од 30 секунди.
Резултатите покажаа дека некои пациенти можеле да го достигнат прагот за дијагноза на хипертензија само поради положбата на раката. NHS наведува дека нормалниот крвен притисок се движи меѓу 90/60 mmHg и 120/80 mmHg, додека секоја вредност над 135/85 mmHg при мерење дома и 140/90 mmHg или повеќе при мерење од страна на здравствен работник се смета за висока.