Луѓето кои се во сериозна врска, но не живеат со својот партнер, го оценуваат својот сексуален нагон повисоко од оние кои делат заеднички дом, покажува анкетата спроведена меѓу 2.500 Американци.
Како што пренесува „New York Post“, истражувањето е спроведено од компанијата Lovehoney, која продава производи за сексуално здравје. Испитаниците одговарале на прашања поврзани со сексуалниот нагон, зачестеноста на сексуалните односи и задоволството во врската.
Резултатите покажуваат дека 55 отсто од Американците имаат сексуални односи поретко отколку што би сакале, додека само 30 отсто се целосно задоволни од својот интимен живот. Една четвртина од испитаниците, поточно 26 отсто, наведуваат дека размислуваат за секс неколку пати дневно.
Испитаниците го оценувале својот сексуален нагон на скала од еден до десет. Највисока просечна оценка, 6,58, дале луѓето кои се во сериозна врска, но не живеат со партнерот. По нив следуваат партнерите кои живеат заедно (5,90), брачните парови (5,76) и оние кои се сами (5,68).
Речиси 73 отсто од испитаниците кои се во врска, но не живеат со партнерот, велат дека чувствуваат сексуална желба неколку пати во текот на денот. Сепак, паровите кои живеат под ист покрив, во просек, имаат почести сексуални односи.
Кога не би постоеле практични пречки, 36 отсто од испитаниците идеално би имале секс неколку пати неделно, а 21 отсто – секој ден. Истражувањето исто така покажа дека американските сојузни држави каде што сексуалниот нагон е најизразен, не се нужно оние каде што луѓето имаат секс најчесто.
Овој начин на одржување врска е познат како „живеење одвоено, но заедно“ (англиски: Living Apart Together – LAT). Паровите кои го избираат овој модел велат дека тој им носи повеќе страст, а помалку досада. Според социјалниот психолог Саманта Џоел, како предности тие ги истакнуваат поголемото возбудување и помалата монотонија во врската.
Овој тренд е популарен и на TikTok. Инфлуенсерката Лоран Елис, која живее во посебен дом од својот сопруг, вели дека ваквиот начин на живот е наменет за моногамни парови кои се сакаат, но истовремено го ценат и личниот простор. Според неа, тоа ѝ помогнало да се развие како личност и ја зајакнало врската. „Кога ти недостасува партнерот, тоа ја зачинува врската“, рече таа во едно видео.