Иако повремениот пост стана популарен како метод за слабеење во последниве години, новите истражувања покажуваат дека луѓето со прекумерна тежина кои го користат не губат повеќе тежина од оние кои следат стандардна диета со ограничен внес на калории.
Режимите што се менуваат помеѓу периодите на јадење и постење станаа популарен начин за слабеење, а некои поддржувачи тврдат дека се поефикасни од стандардните диети. Сепак, научните истражувања покажуваат дека тоа не е случај, објави „Фајненшл тајмс“.
Луис Гарењани, главен автор на студијата од Центарот Кокрејн во Универзитетската болница Италијано во Буенос Аирес, рече: „Повремениот пост може да биде разумна опција за некои луѓе, но сегашните докази не го оправдуваат ентузијазмот што се гледа на социјалните медиуми. Резултатите се слични на традиционалните диететски пристапи кон слабеење.“
Студијата, која анализирала 22 рандомизирани клинички испитувања во кои учествувале 1.995 луѓе со прекумерна тежина и дебелина од целиот свет, открила дека главната придобивка од повремениот пост е вкупното намалување на калориите, а не специфичните метаболички ефекти поврзани со наизменични периоди на јадење и постење.
Кит Фрејн, професор по човечки метаболизам на Универзитетот во Оксфорд, додаде: „Истражувањето не ги поткрепи тврдењата дека повремениот пост има специфичен ефект врз метаболизмот надвор од самото намалување на калориите“.
Пол Гарнер од Ливерпулското училиште за тропска медицина истакнува дека студиите честопати не ги земаат предвид мотивираните луѓе кои одлучуваат сами да практикуваат повремени постови, додека Адам Колинс, вонреден професор по исхрана на Универзитетот во Сари, го објаснува феноменот на ефектот на Хоторн: дури и контролните групи кои „не прават ништо“ честопати несвесно губат тежина затоа што ја менуваат својата исхрана или активност поради следењето во студијата.
Иако новите лекови против дебелина им помагаат на многу луѓе, тие се скапи, ограничени и ефектите исчезнуваат ако третманот се прекине. Главната порака на научниците е јасна: доследноста и намалувањето на калориите се клучеви за успешно губење на тежината, без разлика дали се користи повремен пост или традиционална диета.