Ако барате едноставен десерт за кој не се потребни многу состојки, чоколадната торта без брашно е одличен избор.
Се подготвува од неколку основни состојки, а благодарение на богатиот вкус на чоколадо, совршена е за разни пригоди.
Состојки:
- 150 грама путер
- 6 јајца
- 300 грама темно чоколадо
- 200 грама шеќер
- 30 грама какао во прав
- 1 лажичка сол
- Екстракт од ванила
Подготовка:
Најпрво, загрејте ја рерната на 180°C. Подмачкајте калап за торта со дијаметар од 24 см со путер или обложете го со хартија за печење.
Ставете ги чоколадото и путерот во сад и растопете ги на тивок оган, повремено мешајќи. Откако целосно ќе се соединат, тргнете ја смесата од оган и оставете ја малку да се излади.
Во меѓувреме, одвојте ги жолчките од белките. Во жолчките додадете ги какаото во прав, солта, 100 грама шеќер и – по желба – малку екстракт од ванила. Изматете сè со миксер, а потоа додадете ја смесата од растопено чоколадо и путер и повторно кратко измешајте.
Во посебен сад, изматете ги белките. Постепено додавајте ги преостанатите 100 грама шеќер и матете додека не добиете цврст снег.
Потоа, внимателно додадете ги изматените белки во чоколадната смеса. Нежно измешајте со шпатула за да ја задржите смесата воздушна и хомогена. Префрлете ја смесата во подготвениот калап и печете околу 30 минути на 180°C. Откако ќе се формира коричка на површината, проверете дали тортата е печена со помош на чепкалка за заби.
Ако чепкалката излезе речиси сува, извадете ја тортата од рерната и оставете ја да се излади пред послужување. По желба, можете да ја послужите со свежо или динстано шумско овошје и топка сладолед од ванила.