Четвртата сезона на политичкиот трилер на Netflix, „Дипломатот“ (The Diplomat), во кој главната улога ја толкува Кери Расел, пристигна со рејтинг од 100 отсто на Rotten Tomatoes, пренесува Forbes.
Оценката сè уште се формира бидејќи пристигнуваат нови рецензии, па можно е и да се намали; сепак, претходните сезони сугерираат дека евентуалниот пад веројатно ќе биде незначителен.
Третата сезона има рејтинг од 97 отсто, втората 95 отсто, а првата 85 отсто. Серијата има вкупна оценка од критичарите од 94 отсто, додека публиката е значително построга, давајќи ѝ 74 отсто.
Новата сезона излезе само една година по претходната – што одговара на временскиот интервал помеѓу втората и третата сезона – што е реткост за серии на стриминг платформи од овој калибар. Третата сезона доби седум номинации за наградата Emmy, вклучително и за најдобра драма и најдобра главна женска улога, при што Алисон Џени освои награда за својата споредна улога.
Дејството во новата сезона започнува со непланирано застанување во замокот Виндзор, каде што Кејт почнува да се сомнева во односот помеѓу Хал и Грејс, додека истовремено се обидува да се справи со последиците од нивните тајни постапки.
На IMDb, финалната епизода од сезоната, насловена Warships, има оценка 9,6 – највисока во историјата на серијата – иако, засега, таа може да биде оценета само од гледачи кои ја изгледале целата сезона одеднаш.
Кери Расел и Метју Рис глумеа брачен пар – кои истовремено беа и руски шпиони – во серијата The Americans, а подоцна стапија во брак и во реалниот живот. Оваа година, Рис освои Еми за серијата Widow’s Bay, со што, според Forbes, стана рекордер по бројот на освоени награди „Еми“ во категоријата за главна машка улога, опфаќајќи драмски, хумористични и ограничени серии. Netflix сè уште официјално нема потврдено петта сезона.